ليه يا قلبي ليه ؟؟

لسة ماشي في سكتو
أنساهو خلاص !!!
أنساها طيبة بسمتو
أصلو جفاك خلاص
منك غير إتجاه نظرتو
قبُل دة أنا ما وصيتك ؟؟
ليه بتتجاهل إنت الوصية ؟
وتمشي في السكة الغلط
تجيني مليان بالأسية
توب خلاص أرجع
دة الحب صبح جريمة
والأيام غيرت توبا
صبحت فظة ولئيمة
والمشاعر السامية صبحت
مرسي للذكري الأليمة
وجاي تشكي ليه ؟؟
براك مشيت في سكتو
راجع بتبكي ليه ؟؟
براك مشيت
طمعان في جنتو
يا قلبي هوي
طريق الجنة محفوف صعاب
أختاهو ما تغرك نُضرتو
ما بتلدغ المؤمن مرتين من جحر
وإنت مرتين بتنجرح
بي خنجر واحد
مرتين بتنجرح !!!
ويقيف الزمن عليك شاهد
وبرضك لسة بتعاند !!
شوف وين وداك العناد
وداك الجحيم !!!
لبست توب حداد
دي الحنية صبحت عدم
وإتوشحت الأيام سواد
يا قلبي إنت الجنيت
براك إتقطع سهاد
إنت الجنيت
براك إتقطع سُهاد