يمه أغفري لينا جينا

***
عزنا وعزة بلدنا فتنا منها وانخدعنا
موج سراب ودانا ليها ونحن سرنا وانقطعنا
قلنا رايحين قلتي لا لا ويمه قولك ما سمعنا
ودابو قولك جانا واقع إلا قبلو كمان وقعنا
ونحن مما فتنا دارنا في العيون يوم ما ارتفعنا
التمن يا يمه غالي ونحن ليهو الروح دفعنا
هم كبير ودرب خطير وسكه تب ماليها معنى
لا دراهم لا مظالم نحنا بس للعز رجعنا

***

الحياه لحظات قصيره يمه وين نلقاها تاني
وين بنلقى رضا الحبايب صبحوا يا حليلهم أماني
وبلدي مما فت منو ديمه سيرتو معذباني
والمكان الرحت ليهو أصلو يوم ما كان مكاني
ما قدرته أحس بفرحه والجمال غيركم عماني
وعقدة الذنب بي فراقكم يمه والاحباط شقاني
شلته دمعي وباقي شمعي وجيت أفتش عن حناني
ولو هربت أنا من بلادي كيف حاهرب من زمانى

***
يمه جد الغربه ذله والشقى اليوم هو المهاجر
يومو حسره وليلو آهات وعيشتو هم ما ليهو آخر
حتى ناس بلدي الهناك البسالمك يمه نادر
وحتى أقرب اقربائك لا بيحن ليك لا بيزاور
كل واحد يقضي ليلو ساهي في أوهامو ساهر
مره يحلم باللواري وهمو يصبح أغنى تاجر
ولما يصحى يبكي تاني لما يشعر روحو خاسر
أصلو دنيا الغربه سراً البيكشفو ما بيسافر

***

يمه أغفري لينا جينا لي بلدنا ولي ترابها
كلمي النيلين تصفق والصداقه تضوى بابها
والعصافير المهاجره خلى يبقى النيل شرابها
وتوتي بي خضرة جروفها وضىء أماسيها ورحابها
والمدن الزاهيه ترقص بكره بيرجعوا كل شبابها
وكل واحد فات بلادو ضاق شقا الغربه وعذابها
حس إنو بلادو أجمل مهما كل الغاليه جابها
أصلو عزك في بلادك وفيها سيرة الموت حبابها